Scho zum einesächzgiste Mau si bi strahlend schöner Herbstsunne vieli Löiferinne u Löifer ar Startline vom Brienzerseelouf gstange. Ganz so mängisch isch dr LCA zwar no nid derbi gsi, aber me cha‘s glich scho fasch aus Tradition bezeichne, dass sech ufe Ufruef vom Bernard so viu LCA-Mitglieder gmäudet hei, dass 10 Staffle u 5 Einzulöifer dr Wäg ume See respektive dr Haubmarathon ab Hofstette unger d'Füess gno hei.
Pünktlech am elfi isch es für diejenige los gange, wo d‘Seeumrundig elleini hei wöwe bewältige. E Viertustung speter... nei, d'Staffulöifer wäre zwar parat gsi, aber bevor si hei dörfe starte, isch zersch no ds Postouto über d'Startlinie gfahre.
Dr Brienzerseelouf het 1957 ds erste Mau ar Stell vom jährleche Orientierigslouf vom TV Bönige stattgfunge. Ob das dr Grund gsi isch, dass d'Streckemarkierig a neuralgische Stelle gfäut het oder ob's äch doch am verführerische Duft vo de legendäre Cremeschnitte vom Grandhotäu Giessbach gläge isch, dass es dert fasch d'Häufti vo aune LCA-Staffle i Richtig Hotäu statt es letschts Mau dr Hoger dsdüruf zoge het, het ou nach Rennschluss nid chönne klärt wärde.
Aber zum Glück isch ds Renne bim Forsthuus no lang nid verbi gsi u d'Löifer vor zwöite u dritte Teilstrecki hei dr Rückstand entlang vom rächte Brienzerseeufer bis ids Ziu chönne ufhole oder dr Vorsprung uf d'Verfouger usboue. U drum si ou bir einesächzgiste Usgab vom Brienzerseelouf wieder mehreri holzige Speziauprise vom Oberland i Richtig Bärn... wobi di Prise scho vor dr Übergab für ifrigi Diskussione zum beste Verwändigszwäck gsorget hei.
D'Dominanz vom LCA isch sogar dr lokale Press ufgfaue - dass äxtra wäg em LCA die nöii Kategorie 4-er Staffle isch igfüehrt worde, isch aber nume es Grücht: https://www.jungfrauzeitung.ch/artikel/158851/?q=brienzerseelauf

(14. Oktober 2017 / Text: C. Selzer; Bilder: L. Arnold, mj)