Nacheme froschtige Oschtertrainings Uftakt am Karrfritig, het sech z Wätter am Samschtig versöhnlecher zeigt. Es Grüppli vo 13 Persone isch am Samschtig Nami bi dr Bodenweid erschine. Nachdäm mer z Duschproblem wäg dr zuenige Garderobe hei glöst, heimer chönne starte.
Wie letscht Jahr isch am Tinu sini Vizefotografin mit ihrem Brüetsch auso di beide Ching vor Kathrin wieder dr bi gsi. Für Gruppeiteilig hei die farbige Oschtereili vor Marianne dient. Nachdäm jede sini Farb respektiv die beide Partner gfunde het, isch am Start nüme im Wäg gstande.
Mir si wieder am bekannte Schema gfougt einisch immer rächts ume einisch immer links. Oder eifach gseit die chlini und die grossi Rundi. Öb deu di einti Runde unfreiwillig no chli verlängeret hei, isch völlig Wurscht Houptsach aui stö am Schluss wieder am Ziu.
Nach däm Training simer ids Restaurant da Vito go z Nacht ässe. Dert simer härzlech empfange worde und hei sogar im gheizte Wintergarte dörfe Platz näh. Z guete Ässe und die super Bedienig hei dä schön Tag no abgrundet.

(8. April 2023 / Text, G. Kurath; Bilder, mj)