Ostertraining 2026 |
Ou wenn d Wäut us de Fuege keit, wenn dr Presi vo üs wächslet, wenn nöii Gsichter chöme,. Auti gö, wenn z Wätter grusig isch, oder schön, mir si da. Mir mit em LCA Logo ufe Rügge. Und drü mau dörft dir rate, wenn: Richtig am Karfritig ufem Bäupbärg und das sit mängem Jahr so sicher wie z Amen i dr Chiuche. Zaurich ströme zwüsche zwänzgt und drissgt Lüt und im Gepäck e schweti Oschtereier ufe Parkplatz unter em Chutze. Z Wätter steut genau zum Karfritig uf Frühlig um. So steit dene drei Gruppe plus der Walker nüt meh im Wäg auso los uf die Rundine.
Ig der Schriber und mini Walking Gruppe marschiere ou los. Es wird flissig vorwärtsmarschiert aber ou z Rede unter e nand mues no Platz ha.
Schliesslech het me z einte oder z andere scho lang nüme gseh. Ufem Chutze obe am Schluss no e Haut zum d Usicht gniesse und de geits z rügg zum Ziel. Schliesslech fröie sech aui uf z Traditionelle Eier Tütsche. Mit emne Eier, Brot, Chäs und Chueche Buffet lömer dä Morge la usklinge.
A tout a l heure bis am Oschtermändig ir Bodeweid. Vo dert findet nämlech z zwöite Training statt, i der Hoffnig, dass aui Eier und dr Schoggi verdout si, und mir wieder möge. Diesmau gits äbe e Longjogg. Mir si zwar chli weniger aus no am Fritig aber d Motivation isch dr für da. Ou hüt isch z Wätter top was weimer no meh. Aui Gruppe schwärme us. Mini Gruppe geit dieses Jahr i Könizbärgwaud. Dert geits gfüht geng nume ufe, angers aus im Bremer. Macht nüt für das simer ja im LCA zum trainiere. De geits Richtig Köniz, am Hus vor Marianne und em Roger verbi über d Weiermatt uf di berühmti Herzwil Liebewil Route. Nach zwöi Stund simer wieder zrügg ufem Parkplatz Bodeweid. Die einte oder angere gseh mer no bevor mer wieder hei fahre.
(30. April 2026 / Text: Gabi Kurath / Bilder:mj)
Zurück zur Übersicht